桌上電腦年度大掃除：散熱膏更換+內部清潔教學

桌上電腦年度大掃除：散熱膏更換+內部清潔教學

你部桌上電腦對上一次打開機箱係幾時？如果已經超過一年，個機箱內部嘅積塵量可能令你嚇一跳。今日 CentralComputer 同你講解完全部清潔流程。

點解要定期清潔電腦？

香港空氣中嘅塵埃微粒特別多，加上潮濕天氣，電腦內部積塵唔單止會阻礙散熱，仲可能導致短路。我哋見過最誇張嘅 case 係部機成個 CPU 散熱器俾塵塞滿，開機 10 分鐘就過熱 auto shutdown。清完之後溫度正常返。

事前準備

• 螺絲批（十字為主，有啲機箱要星形 T10/T15）
• 氣泵或壓縮空氣罐（唔好用吸塵機，會產生靜電）
• 99% 異丙醇（清潔 CPU/散熱器表面）
• 新散熱膏（推薦 Arctic MX-6 或 Noctua NT-H2）
• 微纖維布
• 防靜電手環（最好有，冇嘅話摸嚇金屬機箱放靜電）

步驟一：斷電開箱

熄機、拔電源線、按住 Power 掣 10 秒放曬底板餘電。然後打開機箱側板（通常係擰鬆機箱後面兩粒螺絲）。

步驟二：清理風扇同散熱器

CPU 散熱器係積塵最嚴重嘅地方。用氣泵由內向外吹走塵埃，留意風扇扇葉底部嘅積塵。如果風扇有雜音，可能係啤鈴磨損，需要更換風扇（約 $50-150）。

步驟三：更換散熱膏

1. 擰鬆 CPU 散熱器嘅扣具，小心拆下散熱器。
2. 用異丙醇 + 微纖維布抹走舊散熱膏（CPU 表面同散熱器底部都要清潔）。
3. 喺 CPU 中央唧一粒黃豆大細嘅新散熱膏。
4. 裝回散熱器，均勻壓平散熱膏。

步驟四：清理機箱其他部位

• 火牛風扇（從機箱後面吹）
• 底板表面（用軟毛刷輕輕掃）
• 機箱入風位隔塵網（拆出嚟用水沖洗，晾乾先裝返）
• 顯示卡風扇（用氣泵吹）

步驟五：重新組裝及測試

裝返所有零件，插返電源線開機。入 BIOS 或 Windows 用 HWMonitor 檢查 CPU 溫度。正常 idle 應該喺 30-40°C，full load 唔超過 80°C。

以上所有工具加埋大約 $200-300。如果你覺得自己搞太麻煩，或者驚整壞，可以 WhatsApp 我哋 CentralComputer 預約上門清潔服務，$300 起包散熱膏。